സാംസങ് ഗ്യാലക്സിയുടെ പുതിയ ഫോള്‍ഡബിള്‍; ഫ്‌ളിപ് ഫോണുകള്‍ എത്തി

സാംസങ് ഗ്യാലക്സിയുടെ പുതിയ ഫോള്‍ഡബിള്‍, ഫ്‌ളിപ് ഫോണുകള്‍ അവതരിപ്പിച്ചു. പാരിസിലെ സാംസങ് ഗ്യാലക്സി അണ്‍പാക്ഡ് ഇവന്റിലാണ് ഗ്യാലക്സി സെഡ് ഫോള്‍ഡ് 6, സെഡ് ഫ്‌ളിപ് 6 എന്നിവ അവതരിപ്പിച്ചത്. ഡിസൈനിലും ഫീച്ചറുകളിലും ഏറെ പുതുമയുണ്ട്. ഏറ്റവും അത്യാധുനികമായ ആര്‍ട്ടിഫിഷ്യല്‍ ഇന്റലിജന്‍സ് ഫീച്ചറുകളാണ് ഇവയുടെ പ്രത്യേകത.

ഗ്യാലക്സി സെഡ് ഫോള്‍ഡ് 6ന് 7.6 ഇഞ്ച് ഡൈനാമിക് അമോല്‍ഡ് ഡിസ്പ്ലെയാണുള്ളത്. പുറത്തെ സ്‌ക്രീനിന്റെ വലിപ്പം 6.3 ഇഞ്ച്. ഫോള്‍ഡബിള്‍ ഫോണിന്റെ കരുത്ത് വര്‍ധിപ്പിക്കുന്നതാണ് പുതിയ മോഡലുകള്‍. ഗ്യാലക്സി സെഡ് ഫോള്‍ഡ് 6, സെഡ് ഫ്ളിപ്പ് 6 എന്നിവയ്ക്ക് സ്നാപ്ഡ്രാഗണ്‍ 8 ജെന്‍ 3 പ്രൊസസറാണ് ഉള്ളത്. ഫോണ്‍ 12 ജിബി റാമിന്റെതാണ്.

മൂന്ന് ട്രിപ്പിള്‍ റീയര്‍ ക്യാമറ വരുന്ന ഫോണില്‍ 12 എംപിയുടെ അള്‍ട്രാ-വൈഡ് സെന്‍സര്‍, 50 എംപി വൈഡ് ആംഗിള്‍ സെന്‍സര്‍, 10 എംപി ടെലിഫോട്ടോ ലെന്‍സ് എന്നിവ ഉള്‍പ്പെടുന്നു. 10 എംപിയുടെ സെല്‍ഫീ ക്യാമറയും 4 എംപിയുടെ അണ്ടര്‍ ഡിസ്പ്ലെ ഷൂട്ടറുമാണ് മറ്റ് പ്രത്യേകതകള്‍.

ഗ്യാലക്സി സെഡ് ഫ്‌ളിപ് 6ന് 6.7 ഇഞ്ച് ഡൈനമിക് അമോല്‍ഡ് 2എക്സ് ഡിസ്പ്ലെയാണ് വരുന്നത്. 187 ഗ്രാമാണ് ഫോണിന്റെ ഭാരം. ഈ ഫോണും 12 ജിബി റാമോടെയാണ് വിപണിയില്‍ എത്തുന്നത്. 256, 512 ജിബി സ്റ്റോറേജ് ഓപ്ഷനുകളുണ്ട്. 4,000 എംഎഎച്ചിലുള്ള ഈ ഫോണിന് 25 വാട്ടിന്റെ വയേര്‍ഡ് ചാര്‍ജറാണ് ഒപ്പം ലഭിക്കുക.

സാംസങ്ങ് ഗ്യാലക്സി എഐ സംവിധാനങ്ങള്‍ രണ്ടിലുമുണ്ടാവും. ഗൂഗിളിന്റെ സര്‍ക്കിള്‍ ടു സെര്‍ച്ചും, ജെമിനി എഐ ചാറ്റ്ബോട്ടും ഇതോടൊപ്പം സാംസങ്ങ് നല്‍കുന്നുണ്ട്. ആന്‍ഡ്രോയിഡ് 14 പ്ലാറ്റ്ഫോമിലാണ് ഈ ഫോള്‍ഡബിളുകള്‍ ലഭ്യമാവുക. ഏഴ് വര്‍ഷത്തെ ആന്‍ഡ്രോയ്ഡ് ഒഎസ്സും, സെക്യൂരിറ്റി അപ്ഡേറ്റുകളും യൂസര്‍ക്ക് ലഭിക്കും.

ഇന്ത്യയില്‍ 1,64,999 രൂപ മുതലാണ് സാംസങ് ഗ്യാലക്സി സെഡ് ഫോള്‍ഡ് 6ന്റെ 56 ജിബി സ്റ്റോറേജുള്ള അടിസ്ഥാന വേരിയന്റിന്റെ വില ആരംഭിക്കുക. 512 ജിബിക്ക് 1,76,999 രൂപയും 1ടിബിക്ക് 2,00,999 രൂപയുമാകും. ഗ്യാലക്സി സെഡ് ഫ്‌ളിപ് 6 ഇന്ത്യയില്‍ 1,09,999 രൂപ മുതലാണ് ആരംഭിക്കുക. ജൂലൈ 10ന് ഇരു മോഡലുകളുടെയും പ്രീ-ഓര്‍ഡര്‍ ആരംഭിച്ചിരുന്നു. ജൂലൈ 24 മുതല്‍ ഇവ വാങ്ങാനാകും.