ഇന്ത്യന്‍ ഇ-കൊമേഴ്സ് ഭീമനായ ഫ്ലിപ്കാര്‍ട്ടുമായുളള സഹകരണം പ്രഖ്യാപിച്ച് ബജാജ് ഓട്ടോ. എല്ലാ ബജാജ് ബൈക്കുകളും ഇനിമുതല്‍ ഫ്ലിപ്കാര്‍ട്ടില്‍ ലഭ്യമാകുമെന്ന് കമ്പനി അറിയിച്ചു. ആദ്യഘട്ടത്തില്‍ ഇന്ത്യയിലെ 25 നഗരങ്ങളില്‍ മാത്രം ലഭ്യമാകുന്ന സേവനം കാലക്രമേണ രാജ്യവ്യാപകമാക്കാനാണ് കമ്പനി പദ്ധിയിടുന്നത്.

ലോഞ്ചിന്റെ ഭാഗമായി ഉപഭോക്താക്കള്‍ക്ക് 5,000 രൂപ വരെ കിഴിവ്, 12 മാസത്തെ നോ-കോസ്റ്റ് EMI തുടങ്ങിയ ഓഫറുകള്‍ പരിമിത കാലയളവിലേക്ക് കമ്പനി വാഗ്ദാനം ചെയ്യുന്നുണ്ട്.

കേരളത്തില്‍ നിന്നുള്ള പ്രമുഖ മൈക്രോഫിനാന്‍സ് സ്ഥാപനമായ മുത്തൂറ്റ് മൈക്രോഫിന്‍ പലിശ നിരക്ക് 35 ബേസിസ് പോയിന്റ് കുറച്ചു. ഈ വര്‍ഷം രണ്ടാം തവണയാണ് കമ്പനി പലിശ നിരക്ക് കുറയ്ക്കുന്നത്. ഇതോടെ മുത്തൂറ്റ് മൈക്രോഫിന്‍ വായ്പ നിരക്ക് 23.65 ശതമാനത്തില്‍ നിന്ന് 23.30 ശതമാനമായി കുറഞ്ഞു.

മുന്‍പ് ജനുവരിയില്‍ പലിശ നിരക്ക് 55 ബേസിസ് പോയിന്റ് കുറച്ചിരുന്നു. ഉപഭോക്താക്കള്‍ക്ക് കമ്പനിയുടെ സേവനങ്ങള്‍ കൂടുതലായി ലഭിക്കാനുള്ള പ്രതിബദ്ധതയുടെ ഭാഗമാണ് ഈ നീക്കം.

ഒരു ഉപഭോക്തൃ കേന്ദ്രീകൃത മൈക്രോഫിനാന്‍സായ മുത്തൂറ്റ് മൈക്രോഫിന്‍ കോസ്റ്റ് ഓഫ് ഫണ്ടിലെ (സിഒഎഫ്) നേട്ടം വായ്പക്കാരുമായി പങ്കിടുന്നത് തുടരുമെന്ന് മുത്തൂറ്റ് മൈക്രോഫിന്‍ സിഇഒ സദാഫ് സയീദ് പറഞ്ഞു.

ഡിജിറ്റല്‍, സാമ്പത്തിക സാക്ഷരത നല്‍കി മുത്തൂറ്റ് മൈക്രോഫിന്‍ സാമ്പത്തിക ഉള്‍പ്പെടുത്തലിലും ഉപഭോക്താക്കളെ ശാക്തീകരിക്കുന്നതിലും ശ്രദ്ധ കേന്ദ്രീകരിക്കുന്നത് തുടരുമെന്ന് മുത്തൂറ്റ് മൈക്രോഫിന്‍ എംഡി തോമസ് മുത്തൂറ്റ് പറഞ്ഞു.

മുത്തൂറ്റ് മൈക്രോഫിന്‍ നിലവില്‍ 19 സംസ്ഥാനങ്ങളില്‍ സേവനം നല്‍കുന്നുണ്ട്. രാജ്യത്തുടനീളം 1,508 ശാഖകളുമായി 357 ജില്ലകളില്‍ സാന്നിധ്യമുണ്ട്. രാജ്യത്തിന്റെ ഗ്രാമപ്രദേശങ്ങളില്‍ താമസിക്കുന്ന 33.5 ലക്ഷം ഉപഭോക്താക്കള്‍ക്കാണ് കമ്പനി സേവനം നല്‍കുന്നത്.

സന്തോഷം കൊണ്ട് എനിക്ക് ഇരിക്കാൻ വയ്യേ’ എന്ന അവസ്ഥയിലാണ് ആഭരണപ്രേമികൾ. കാരണം വേറെ ഒന്നുമല്ല, സംസ്ഥാനത്തെ സ്വർണവില തുടർച്ചയായി കുറയുകയാണ്. 17-ആം തീയ്യതി 55,000 രൂപയിലെത്തിയ പവന്‍റെ വില എന്നാൽ കഴിഞ്ഞ മൂന്ന് ദിവസമായി തുടർച്ചയായി കുറഞ്ഞു. വരും ദിവസങ്ങളിലും സ്വർണവില താഴേക്കിറങ്ങിയാൽ അത് ആഭരണം വാങ്ങുന്നവർക്ക് വലിയ ആശ്വാസമായിരിക്കും.

ഇന്നത്തെ വില

പവന് 54,520 രൂപ എന്ന നിരക്കിലാണ് സംസ്ഥാനത്ത് ഇന്നകലെ സ്വർണവ്യാപാരം നടന്നത്. എന്നാൽ ഇന്ന് പവന് 280 രൂപയും, ഗ്രാമിന് 35 രൂപയുമാണ് വില താഴ്ന്നിരിക്കുന്നത്. അതോടെ ഒരു പവൻ സ്വർണത്തിന് 54,240 രൂപയും, ഗ്രാമിന് 6,780 രൂപയുമാണ് വില.

കഴിഞ്ഞ ബുധനാഴ്ച്ച ആഗോള സ്വർണ്ണ വില ചരിത്രത്തിലെ ഉയർന്ന നിരക്കായ 2,483.60 ഡോളറിലേക്ക് ഉയർന്നിരുന്നു. ഇക്കഴിഞ്ഞ വാരത്തിന്റെ ആദ്യ പകുതിയിൽ മാത്രം 3% ഉയർച്ചയാണ് വിലയിലുണ്ടായിരിക്കുന്നത്. എന്നാൽ പിന്നീട് വൻ തോതിൽ ലാഭമെടുപ്പ് നടന്നതാണ് വില തിരിച്ചിറങ്ങാൻ കാരണം.

ആഗോള സ്വർണ്ണവില

ആഗോള തലത്തിൽ, കനത്ത ഇടിവിലാണ് സ്വർണ്ണ വ്യാപാരം വാരാന്ത്യത്തിൽ ക്ലോസിങ് നടത്തിയിരിക്കുന്നത്. ട്രോയ് ഔൺസിന് 41.05 ഡോളർ (1.68%) താഴ്ന്ന് 2,400.78 ഡോളർ എന്നതാണ് നിരക്ക്.

ആഭരണം വാങ്ങാൻ എത്ര നൽകണം..?

പവന്‍റെ വില തുടർച്ചയായി കുറഞ്ഞ സാഹചര്യത്തിൽ വലിയ അളവിൽ സ്വർണം വാങ്ങുന്നവർക്ക് ആശ്വാസമാണ്. സ്വർണാഭരണം വാങ്ങുമ്പോൾ പവന്‍റെ വിലയോടൊപ്പം പണിക്കൂലി, നികുതി, ഹാൾമാർക്കിംങ് നിരക്കുകൾ തുടങ്ങിയ കൂടി നൽകണം. ശരാശരി 5 ശതമാനമാണ് പണിക്കൂലി. 3 ശതമാനം ജിഎസ്ടിയും. അങ്ങനെ കണക്ക് കൂട്ടുമ്പോൾ ഒരു പവൻ സ്വർണാഭരണം വാങ്ങാൻ ഏകദേശം 59,000 രൂപ നൽകേണ്ടി വരും

അഡ്വാന്‍സ് ബുക്കിംഗ് നല്ലതാണ്

നിലവിലെ ആഗോള സ്വര്‍ണവിപണി ട്രെന്‍ഡുകള്‍വരും ദിവസങ്ങളിലും സ്വര്‍ണവില ചാഞ്ചാടുമെന്ന സൂചന നല്‍കുന്നു. യുഎസ് പ്രസിഡന്റ് തെരഞ്ഞെടുപ്പ് ഒരു പ്രധാന ഘടകമാണ്. യുഎസ് ഫെഡ് യോഗം അടുക്കുന്തോറും അസ്ഥിരത വര്‍ധിക്കാം. അതുകൊണ്ടു തന്നെ വലിയ അളവിൽ സ്വർണാഭരണം വാങ്ങാൻ ഉദ്ദേശിക്കുന്നവർ അഡ്വാന്‍സ് ബുക്കിംഗ് നടത്തുന്നതാണ് നല്ലത്. കാരണം പവന്‍റെ വിലയിൽ വർധനവുണ്ടായാൽ അതുവഴി ഉണ്ടാകുന്ന സാമ്പത്തിക നഷ്ടം കുറയ്ക്കാൻ അഡ്വാന്‍സ് ബുക്കിംഗ് സഹായിക്കും. സ്വര്‍ണവിലയുടെ 10 ശതമാനം മുതല്‍അഡ്വാന്‍സ് നല്‍കി സ്വര്‍ണം ബുക്ക് ചെയ്യാം. സ്വര്‍ണ വില കൂടിയാല്‍ബുക്ക് ചെയ്ത വിലയിലും വില കുറഞ്ഞാല്‍കുറഞ്ഞ വിലയിലും സ്വര്‍ണം ലഭിക്കും എന്നതാണ് അഡ്വാൻസ് ബുക്കിം​ഗിന്‍റെ പ്രത്യേകത

ഷവോമി രണ്ട് പുതിയ ഫോൾഡബിൾ ഫോണുകൾ അവതരിപ്പിച്ചു. അതിലൊന്നാണ് ബ്രാൻഡിൻ്റെ ആദ്യത്തെ ക്ലാംഷെൽ ഫ്ലിപ്പ് ഫോണായ ഷവോമി മിക്സ് ഫ്ലിപ്പും (Xiaomi MIX Flip) മറ്റൊന്ന് ഫോർത്ത് ജനെറേഷൻ ഹോർട്ടിസോണ്ടൽ ബുക്ക് ശൈലിയിലുള്ള ഫോൾഡിംഗ് ഫോണുമാണ്. കഴിഞ്ഞ വർഷത്തെ ഫോൾഡ് 3യുടെ പിൻഗാമിയായാണ് ഷവോമി മിക്സ് ഫോൾഡ് 4 (Xiaomi MIX Fold 4) വരുന്നത്. ഏറ്റവും പുതിയ ഫോൺ അതിൻ്റെ മുൻഗാമിയെ അപേക്ഷിച്ച് ചില ശ്രദ്ധേയമായ അപ്‌ഗ്രേഡുകൾ പായ്ക്ക് ചെയ്യുന്നു. ഇത് എന്താണ് വാഗ്ദാനം ചെയ്യുന്നതെന്ന് അറിയാം

ഷവോമി മിക്സ് ഫോൾഡ് 4 സവിശേഷതകൾ: മിക്‌സ് ഫോൾഡ് 4ലെ ചതുരാകൃതിയിലുള്ള ബാക്ക് ക്യാമറ മൊഡ്യൂളിൻ്റെ രൂപകൽപ്പനയിൽ ഷവോമി ചെറുതായി മാറ്റങ്ങൾ വരുത്തിയിട്ടുണ്ട്. ഇത് അതിൻ്റെ മുൻഗാമിയേക്കാൾ വലുതാണ്. കൂടാതെ ബോട്ടം എഡ്ജ് കെർവേഡ്‌ ആണ്. ഗോഡിക്സ് നിർമ്മിച്ച ഫിംഗർപ്രിൻ്റ് സ്കാനർ പവർ ബട്ടണിന്റെ ജോലി ഇരട്ടിയാകുന്നു

ഈ ഫോൾഡബിൾ ഫോണിന് കമ്പനിയുടെ ഡ്രാഗൺ ബോൺ എഞ്ചിൻ 2.0 ഉണ്ട്. ഇത് വിശ്വാസ്യത മെച്ചപ്പെടുത്തുകയും കനം മെയിൻറെൻ ചെയ്യുകയും ചെയ്യുന്നു. ഭാരം കുറയ്ക്കാൻ T800H ഉയർന്ന കരുത്തുള്ള കാർബൺ ഫൈബർ ആർക്കിടെക്ചർ നൽകിയിട്ടുണ്ട്. ഹിംഗിന് 500,000 മടക്കുകളുടെ ആയുസ്സ് ഉണ്ടെന്ന് അവകാശപ്പെടുന്നു.

അളവുകൾ അനുസരിച്ച്, ഉപകരണം മടക്കിയാൽ 9.47 മില്ലീമീറ്ററും തുറക്കുമ്പോൾ 4.59 മില്ലീമീറ്ററും ആണ് വരുന്നത്. ഇത് ഹോണർ മാജിക് V3ൻ്റെ അടുത്ത് നിൽക്കുന്ന അളവുകൾ ആണ്. ഈ ഫോണിന് 226 ഗ്രാം ഭാരമുണ്ട്. കൂടാതെ ഇത് IPX8-സർട്ടിഫൈഡ് വാട്ടർ റെസിസ്റ്റൻ്റ് കൂടിയാണ്.

ഷവോമി മിക്സ് ഫോൾഡ് 4ൻ്റെ എക്‌സ്‌റ്റേണൽ മെയിൻ ഡിസ്‌പ്ലേ 6.56 ഇഞ്ച് ക്വാഡ്-കർവ്ഡ് എഡ്‌ജസ് ആണ്. അതേ സമയം, 2,488 x 2,224 പിക്സൽ റെസലൂഷനുള്ള 7.98 ഇഞ്ചാണ് ഇന്റേണൽ ഡിസ്പ്ലേ. രണ്ട് സ്‌ക്രീനുകളിലും OLED പാനൽ, 120Hz റിഫ്രഷ് റേറ്റ്, 3,000 നിറ്റ്‌സ് പീക്ക് ബ്രൈറ്റ്നെസ്സ്, HDR10+, HDR വിവിഡ്, ഡോൾബി വിഷൻ എന്നിവ ആഴത്തിലുള്ള കാഴ്ചാനുഭവം നൽകുന്നു. അകത്തെ സ്‌ക്രീനിൽ അണ്ടർ ഡിസ്‌പ്ലേ ക്യാമറയുള്ള അൾട്രാ-തിൻ ഗ്ലാസുണ്ട്.

ക്യാമറയിലേക്ക് വരുമ്പോൾ, ഷവോമി മിക്സ് ഫോൾഡിൽ 4 Leica-ബ്രാൻഡഡ് ക്വാഡ് ബാക്ക് ക്യാമറകളാണ്. 50 എംപി മെയിൻ സെൻസർ, 12 എംപി അൾട്രാ വൈഡ് ആംഗിൾ ലെൻസ്, 2x സൂം ഉള്ള 50 എംപി പോർട്രെയിറ്റ് ടെലിഫോട്ടോ യൂണിറ്റ്, ഒടുവിൽ 5x സൂം ഉള്ള 50 എംപി പെരിസ്‌കോപ്പ് സ്‌നാപ്പർ എന്നിവ ഈ സജ്ജീകരണത്തിൽ ഉൾപ്പെടുന്നു.

ഹാർഡ്‌വെയർ നോക്കുമ്പോൾ, ഷവോമി മിക്സ് ഫോൾഡ് 4 സ്‌നാപ്ഡ്രാഗൺ 8 Gen 3, 16 ജിബി വരെ റാമും 1 ടിബി സ്റ്റോറേജും ആണ് നൽകുന്നത്. 67W വയർഡ്, 50W വയർലെസ് ചാർജിംഗ് വഴി ടോപ്പ് അപ്പ് ചെയ്യാവുന്ന 5,100mAh ബാറ്ററി സെല്ലാണ് ഈ ഫോണിൻ്റെ പിന്തുണ. ചൂട് പുറംതള്ളുന്നതിനായി വളരെ നേർത്ത VC സിസ്റ്റം ഓൺബോർഡിലുണ്ട്.

ഇനി സോഫ്‌റ്റ്‌വെയർ അടിസ്ഥാനത്തിൽ, ഷവോമി മിക്സ് ഫോൾഡ് 4 ഹൈപ്പർ ഒഎസിൽ ഷിപ്പ് ചെയ്യുന്നു. വിവിധ എഐ ഫീച്ചറുകൾ ഓൺബോർഡിൽ ഉണ്ട്. സെല്ലുലാർ നെറ്റ്‌വർക്ക് ലഭ്യമല്ലാത്തപ്പോൾ ടെക്‌സ്‌റ്റുകൾ സ്വീകരിക്കാനും അയയ്‌ക്കാനും നിങ്ങളെ അനുവദിക്കുന്ന ടു-വേ സാറ്റലൈറ്റ് കണക്റ്റിവിറ്റിയോടെയാണ് ഈ ഫോൾഡബിൾ ഫോൺ വരുന്നത്.

ഷവോമി മിക്സ് ഫോൾഡ് 4 അടിസ്ഥാന 12 ജിബി + 256 ജിബി വേരിയൻ്റിന് CNY 8,999 (ഏകദേശം 1,03,633 രൂപ) മുതൽ ആരംഭിക്കുന്നു. 16 ജിബി + 512 ജിബി, 16 ജിബി + 1 ടിബി കോൺഫിഗറേഷനുകൾക്ക് CNY 9,999 (ഏകദേശം 115148 രൂപ), CNY 10,999 (ഏകദേശം 126665 രൂപ) എന്നിങ്ങനെയാണ് വില. കറുപ്പ്, വെള്ള, നീല നിറങ്ങളിൽ ഈ ഫോൾഡബിൾ ഫോൺ ലഭ്യമാണ്

സൗത്ത് ഇന്ത്യന്‍ ബാങ്ക് നടപ്പു സാമ്പത്തിക വര്‍ഷത്തെ (2024-25) ആദ്യ പാദത്തില്‍ (ഏപ്രില്‍-ജൂണ്‍) 294.13 കോടി രൂപയുടെ ലാഭം രേഖപ്പെടുത്തി. മുന്‍ സാമ്പത്തിക വര്‍ഷത്തെ സമാനപാദത്തിലെ 202.35 കോടി രൂപയേക്കാള്‍ ലാഭം 45.29 ശതമാനം വര്‍ധിച്ചു. ഇക്കാലയളവില്‍ ബാങ്കിന്റെ പ്രവര്‍ത്തന ലാഭം 490.24 കോടി രൂപയില്‍ നിന്ന് 3.56 ശതമാനം വര്‍ധിച്ച് 507.68 കോടി രൂപയുമായി.

ബാങ്കിന്റെ മൊത്ത നിഷ്‌ക്രിയ ആസ്തി (GNPA) 5.13 ശതമാനത്തില്‍ നിന്ന് 4.50 ശതമാനമായും അറ്റ നിഷ്‌ക്രിയ ആസ്തി (NNPA) 1.85 ശതമാനത്തില്‍ നിന്ന് 1.44 ശതമാനമായും കുറഞ്ഞു. അറ്റപലിശ വരുമാനം 7.18 ശതമാനം വര്‍ധിച്ച് 865.77 കോടി രൂപയായി. കറന്റ് സേവിംഗ്സ് അക്കൗണ്ട് (കാസ) അനുപാതം 32.64 ശതമാനത്തില്‍ നിന്ന് 32.03 ശതമാനമായി കുറഞ്ഞു.

ബാങ്കിന്റെ മൊത്തം ബിസിനസ് 1.83 ലക്ഷം കോടിബാങ്കിന്റെ മൊത്തം ബിസിനസ് 1.67 ലക്ഷം കോടി രൂപയില്‍ നിന്ന് 10 ശതമാനം ഉയര്‍ന്ന് 1.83 ലക്ഷം കോടി രൂപയായി. വായ്പകള്‍ 74,102 കോടി രൂപയില്‍ നിന്ന് 11.44 ശതമാനം മെച്ചപ്പെട്ട് 82,580 കോടി രൂപയായി. കോര്‍പ്പറേറ്റ് വായ്പകള്‍ 23.48 ശതമാനം വര്‍ധിച്ച് 33,984 കോടി രൂപയായി. വ്യക്തിഗത വായ്പകള്‍ 1,935 കോടി രൂപയില്‍ നിന്ന് 2,312 കോടി രൂപയായും സ്വര്‍ണ വായ്പകള്‍ 14,478 കോടി രൂപയില്‍ നിന്ന് 16,317 കോടി രൂപയായും വര്‍ധിച്ചു.

12.70 ശതമാനമാണ് സ്വര്‍ണ വായ്പകളുടെ വാര്‍ഷിക വളര്‍ച്ച.ബാങ്കിന്റെ നിക്ഷേപങ്ങള്‍ 95,499 കോടി രൂപയില്‍ നിന്ന് 8 ശതമാനം ഉയര്‍ന്ന് 1.03 ലക്ഷം കോടിയുമായി. റീറ്റെയില്‍ നിക്ഷേപങ്ങള്‍ 8.37 ശതമാനം വര്‍ധിച്ച് 99,745 കോടി രൂപയും പ്രവാസി (എന്‍.ആര്‍.ഐ) നിക്ഷേപം 6.06 ശതമാനം വര്‍ധിച്ച് 30,102 കോടി രൂപയുമായി. കറന്റ് സേവിംഗ് നിക്ഷേപങ്ങള്‍ 31,166 കോടിയില്‍ നിന്ന് 33,196 കോടിയായി.

തുടർച്ചയായ ഉയർച്ചയ്ക്ക് ശേഷം 2 ദിവസമായി സ്വർണവിലയിൽ ഇടിവ്. ഇന്ന് ഗ്രാമിന് 45 രൂപയാണ് കുറഞ്ഞത്. ഇതോടെ ഒരു ഗ്രാം സ്വര്‍ണത്തിന് 6815 രൂപയായി. പവന് 360 രൂപയാണ് കുറഞ്ഞത്. ഒരു പവന്‍ സ്വര്‍ണത്തിന് 54,520 രൂപയിലെത്തി.

ബുധനാഴ്ച ഒരു പവന്‍ സ്വര്‍ണത്തിന്‍റെ വില 55,000 രൂപയിലെത്തിയിരുന്നു. രണ്ട് ദിവസങ്ങള്‍ക്ക് മുന്‍പ് ഒറ്റയടിയ്ക്ക് 720 രൂപ പവന് വര്‍ധിച്ച് സ്വര്‍ണവില ഈ മാസത്തെ ഏറ്റവും ഉയര്‍ന്ന നിരക്കിലെത്തിയിരുന്നു. തുടർന്ന് വ്യാഴാചയും വെള്ളിയാഴ്ചയും തുടർച്ചയായി ഇടിവ് രേഖപ്പെടുത്തുകയായിരുന്നു

ഈ മാസം ആദ്യം തന്നെ ആമസോൺ അതിൻ്റെ പ്രൈം ഡേ സെയിൽ ഇവൻ്റ് പ്രഖ്യാപിച്ചിരുന്നു. അത് ജൂൺ 20ന് ഇന്ത്യയിൽ ആരംഭിക്കും എന്നാണ് ആമസോൺ വെളിപ്പെടുത്തിയത്. ഇപ്പോൾ, ഫ്ലിപ്പ്കാർട്ടും അതേ തീയതിയിൽ തന്നെ അതിൻ്റെ ഗോട്ട് സെയിൽ (GOAT Sale) പ്രഖ്യാപിച്ചു. എന്നിരുന്നാലും, പ്രൈം ഡേ സെയിൽ രണ്ട് ദിവസത്തിന് ഉള്ളിൽ അവസാനിക്കും. അതേ സമയം ഗോട്ട് സെയിൽ ജൂലൈ 25 വരെ ലൈവ് ആയി പ്രവർത്തിക്കും. കൂടാതെ, ഫ്ലിപ്പ്കാർട്ട് പ്ലസ് അംഗങ്ങൾക്ക് സെയിലിലേക്ക് നേരത്തേ ആക്സസ് ഉണ്ടായിരിക്കും. ജൂലൈ 19 മുതൽ അവർക്ക് എല്ലാ ഡീലുകളും ആക്സസ് ചെയ്യാനാകും.

ഗോട്ട് സെയിൽ ഫ്ലിപ്കാർട്ട് ആപ്പിലും വെബ്സൈറ്റിലും ലൈവ് ഉണ്ടായിരിക്കുന്നത് ആണ്. ഫ്ലിപ്കാർട്ട് ഗോട്ട് സെയിലിൽ ഉള്ള ബാങ്ക് ഡിസ്കൗണ്ടുകളും ഓഫറുകളും നോക്കാം. വരാനിരിക്കുന്ന ഗോട്ട് സെയിലിൽ ആക്‌സിസ് ബാങ്ക് (Axis bank), എച്ച്‌ഡിഎഫ്‌സി ബാങ്ക് (HDFC Bank), ഐഡിഎഫ്‌സി ഫസ്റ്റ് ബാങ്ക് (IDFC First Bank) ക്രെഡിറ്റ് കാർഡുകൾ ഉപയോഗിച്ച് വാങ്ങാൻ സാധിക്കുന്നവർക്ക് 5000 രൂപ വരെ 10% ഇൻസ്റ്റന്റ് ഡിസ്‌കൗണ്ട് ലഭിക്കും.

എന്നിരുന്നാലും, ഓരോ ഉൽപ്പന്നത്തിനും യഥാർത്ഥ ഡിസ്‌കൗണ്ട് വ്യത്യസ്തമായിരിക്കും. ഫ്ലിപ്കാർട്ട് ആക്സിസ് ബാങ്ക് ക്രെഡിറ്റ് കാർഡ് ഉപയോഗിച്ച്, 5% അധിക ക്യാഷ് ബാക്കും ലഭിക്കും. എല്ലാവരും ആകാംഷയോടെ കാത്തിരിക്കുന്ന ഫ്ലിപ്കാർട്ട് ഗോട്ട് സെയിലിൽ സ്മാർട്ട്ഫോണുകൾക്കും കിടിലൻ ഡീലുകൾ ആണ് ഉള്ളത്. അവ ഏതൊക്കെ എന്ന് നോക്കാം.

ഐഫോൺ 15, ഗാലക്‌സി എസ് 23, നതിംഗ് ഫോൺ 2 എ, ഗൂഗിൾ പിക്‌സൽ 7 എന്നിവയും മറ്റും പോലുള്ള ഉയർന്ന വിൽപ്പനയുള്ള സ്മാർട്ട്‌ഫോണുകളിൽ ആണ് ഈ ഇ-കൊമേഴ്‌സ് ഭീമൻ ആയ ഫ്ലിപ്കാർട്ട് വലിയ ഡിസ്കൗണ്ടുകൾ വാഗ്ദാനം ചെയ്യുന്നതെന്ന് വരാനിരിക്കുന്ന ഫ്ലിപ്പ്കാർട്ട് ഗോട്ട് സെയിൽ ഇവൻ്റിൻ്റെ ടീസർ പേജ് വെളിപ്പെടുത്തുന്നു.

വെബ്‌സൈറ്റിലെ മൈക്രോസൈറ്റ് അനുസരിച്ച്, നതിംഗ് ഫോൺ 2എക്ക് (Noting phone 2A) വരുന്ന പ്രാരംഭ വില 19,999 രൂപ ആയിരിക്കും. ഇത് കൂടാതെ, ഗൂഗിൾ പിക്സൽ 7 (Google pixel 7) 32,999 രൂപയ്ക്കും പിക്സൽ 8ന് (pixel 8) 47,999 രൂപയ്ക്കും പ്രാരംഭ വിലയിൽ ഉപയോക്താക്കൾക്ക് ലഭ്യമാകും.

ബജറ്റ് സ്മാർട്ട്‌ഫോണായ മോട്ടോ ജി 34 (Moto G 34) 9,999 രൂപയ്ക്ക് ലഭ്യമാകും. അതേ സമയം പുതുതായി പുറത്തിറക്കിയ മോട്ടറോള എഡ്ജ് 50 ഫ്യൂഷൻ (Motorola Edge 50 Fusion), എഡ്ജ് 50 പ്രോ (Edge 50 Pro) എന്നിവയുടെ വില യഥാക്രമം ഓഫറുകൾക്ക് ശേഷം 20,999 രൂപയും 27,999 രൂപയുമാണ് .

ആപ്പിൾ ഐഫോൺ 15നിൻ്റെ (Apple Iphone 15) ഡീൽ വില ഇപ്പോഴും പുറത്ത് വിട്ടിട്ടില്ല. അത് ഉടൻ വെളിപ്പെടുത്തുമെന്ന് പ്രതീക്ഷിക്കുന്നു. അതേ സമയം, സാംസങ് (Samsung), റിയൽമി (Realme), ഷവോമി (Xiaomi) സ്മാർട്ട്‌ഫോണുകളുടെ ഡീലുകളും ഉടൻ തന്നെ വെളിപ്പെടുത്തും എന്നാണ് കരുതുന്നത്.

പുതിയ നിക്ഷേപ പദ്ധതി ആരംഭിച്ച് രാജ്യത്തെ ഏറ്റവും വലിയ പൊതുമേഖലാ ബാങ്കായ സ്റ്റേറ്റ് ബാങ്ക് ഓഫ് ഇന്ത്യ. 444 ദിവസത്തെ നിക്ഷേപ പദ്ധതിയാണിത്. നിക്ഷേപകരെ ആകര്‍ഷിക്കുന്നതിനായി 7.25% പലിശയാണ് പദ്ധതിയില്‍ എസ്ബിഐ നല്‍കുക. നിലവിലുള്ള ഉയര്‍ന്ന നിരക്കിനേക്കാള്‍ 15 ബേസിസ് പോയിന്റുകള്‍ കൂടുതലാണ് ഇതെന്നാണ് എസ്ബിഐ പറയുന്നു.

തിങ്കളാഴ്ച മുതല്‍ ബെഞ്ച്മാര്‍ക്ക് മാര്‍ജിനല്‍ കോസ്റ്റ് ഓഫ് ഫണ്ട് അധിഷ്ഠിത വായ്പാ നിരക്ക് (എംസിഎല്‍ആര്‍) ബാങ്ക് 5 മുതല്‍ 10 ബേസിസ് പോയിന്റുകള്‍ വരെ ഉയര്‍ത്തിയിട്ടുണ്ട്. ഇതിനുശേഷമാണ് എസ്ബിഐയുടെ ഉയര്‍ന്ന നിക്ഷേപ നിരക്ക് ഓഫര്‍ വന്നത്. ഒരു ഉപഭോക്താവിന് വായ്പ നല്‍കാന്‍ കഴിയുന്ന ഏറ്റവും കുറഞ്ഞ പലിശ നിരക്കാണ് എംസിഎല്‍ആര്‍.

ഇത് ലോണുകളും ചെലവേറിയതാക്കും. വാഹന അല്ലെങ്കില്‍ ഹോം ലോണുകള്‍ തുടങ്ങിയവയ്ക്ക് ചെലവേറും. റിസര്‍വ് ബാങ്ക് ഓഫ് ഇന്ത്യ അതിന്റെ സമീപകാല യോഗത്തില്‍ റിപ്പോ നിരക്ക് മാറ്റമില്ലാതെ നിലനിര്‍ത്താന്‍ തീരുമാനിച്ചതിനാല്‍, ഉയര്‍ന്ന പലിശനിരക്കില്‍ എന്തെങ്കിലും കുറവുണ്ടാകാന്‍ വായ്പയെടുക്കുന്നവര്‍ കൂടുതല്‍ കാത്തിരിക്കേണ്ടിവരും. തുടര്‍ച്ചയായ ഒമ്പതാം തവണയാണ് സെന്‍ട്രല്‍ ബാങ്ക് നിരക്ക് മാറ്റമില്ലാതെ നിലനിര്‍ത്തുന്നത്.

ഇന്ത്യയുടെ ഏറ്റവും വലിയ പ്രാദേശിക ഭാഷാ വിനോദ സംവിധാനമായ വിന്‍സോ ലാറ്റിന്‍ അമേരിക്കയുടെ മുന്‍നിര വിദ്യാഭ്യാസ സ്ഥാപനമായ എഫ്ജിവി ഇഎഇഎസ്പിയുമായി കൈകോര്‍ത്തു. ബ്രസീലില്‍ വന്‍ തോതില്‍ മുന്നേറുകയും പ്രാദേശികമായി ജീവനക്കാരെ നിയോഗിക്കുകയും ചെയ്യുന്നതിന് ഇതു വഴിയൊരുക്കും.

മെയ്ഡ് ഇന്‍ ഇന്ത്യ ഗെയിമുകളും സാങ്കേതികവിദ്യയും ലാറ്റിന്‍ അമേരിക്കയില്‍ വിപുലമാക്കാന്‍ വിന്‍സോ 50 ദശലക്ഷം ഡോളറിന്റെ നിക്ഷേപവും നടത്തും. ലാറ്റിന്‍ അമേരിക്കയിലെ സുപ്രധാന ഗെയിം ഈവന്റായ ഗെയിംസ്‌കോം ലതാമില്‍ ഇതാദ്യമായി ഒരു ഇന്ത്യന്‍ പവിലിയന്‍ അവതരിപ്പിച്ചു കൊണ്ടാണ് വിന്‍സോ ഈ നീക്കങ്ങള്‍ നടത്തിയത്.

തങ്ങളുടെ വിദ്യാര്‍ത്ഥികള്‍ക്കും പൂര്‍വ്വ വിദ്യാര്‍ത്ഥികള്‍ക്കും വന്‍ അവസരങ്ങളാണ് ഈ സഹകരണത്തിലൂടെ ലഭിക്കുകയെന്ന് എഫ്ജിവി പ്രൊഫസര്‍ ഓഫ് മാനേജുമെന്റ് ഡോ. ഉമേഷ് മുഖി പറഞ്ഞു.

യാത്ര നിയമങ്ങള്‍ കര്‍ശനമായി നടപ്പാക്കാന്‍ ഇന്ത്യന്‍ റെയില്‍വേ. വെയിറ്റിംഗ് ലിസ്റ്റ് ടിക്കറ്റുകളുമായി യാത്ര ചെയ്യുന്നതുമായി ബന്ധപ്പെട്ട നിയമങ്ങളാണ് കര്‍ശനമാകുന്നത്. റിസര്‍വ് ചെയ്ത കമ്പാര്‍ട്ടുമെന്റുകളില്‍ വെയിറ്റിംഗ് ലിസ്റ്റ് ടിക്കറ്റുമായി യാത്ര ചെയ്യുന്നത് കണ്ടെത്തിയാല്‍, പിഴയും ടിക്കറ്റ് ചെക്കര്‍മാര്‍ യാത്രക്കാരെ ഇറക്കാനുള്ള സാധ്യതയുണ്ടെന്നാണ് സൂചന.

ടിക്കറ്റ് ഓണ്‍ലൈനായോ കൗണ്ടറില്‍ നിന്നോ വാങ്ങിയാലും അത് വെയിറ്റിംഗ് ലിസ്റ്റ് ടിക്കറ്റ് ആണെങ്കില്‍ ആ യാത്രക്കാരെ റിസര്‍വ് ചെയ്ത കോച്ചുകളില്‍ കയറാന്‍ അനുവദിക്കില്ല. കാത്തിരിപ്പ് ടിക്കറ്റുമായി യാത്ര ചെയ്യുന്ന യാത്രക്കാരെ അടുത്ത സ്റ്റേഷനില്‍ ഇറക്കി പിഴ അടപ്പിക്കാനാണ് നീക്കം. റിസര്‍വ് ചെയ്ത കോച്ചുകളിലെ തിരക്ക് കൂടുന്ന പ്രശ്നങ്ങള്‍ പരിഹരിക്കാനാണ് ഇതുവഴി ലക്ഷ്യമിടുന്നത്.

വെയിറ്റിംഗ് ലിസ്റ്റ് ടിക്കറ്റുമായി റിസര്‍വ് ചെയ്ത കോച്ചുകളില്‍ കയറുന്ന യാത്രക്കാരില്‍ നിന്ന് അടുത്ത സ്റ്റേഷനില്‍ ഇറക്കി പിഴ ഈടാക്കും.അതേസമയം കൗണ്ടറില്‍ നിന്ന് വാങ്ങിയ വെയ്റ്റിംഗ് ടിക്കറ്റ് കൈവശമുള്ള യാത്രക്കാര്‍ക്ക് റിസര്‍വേഷന്‍ ആവശ്യമില്ലാത്ത ജനറല്‍ കോച്ചുകളില്‍ യാത്ര ചെയ്യാന്‍ സാധിക്കും.