സംസ്ഥാനത്ത് ഇന്ന് സ്വര്‍ണവില കുത്തനെ കൂടി. ഇന്ന് 280 രൂപയാണ് പവന് കൂടിയത്. ഇതോടെ വിപണിയില്‍ ഇന്ന് ഒരു പവന്‍ സ്വര്‍ണത്തിന്റെ വിപണി വില 54,280 രൂപയാണ്. വിപണിയില്‍ ഇന്ന് ഒരു ഗ്രാം 22 കാരറ്റ് സ്വര്‍ണത്തിന്റെ വില ഗ്രാമിന് 6785 രൂപയാണ് വില. ഒരു ഗ്രാം 18 കാരറ്റ് സ്വര്‍ണത്തിന്റെ വില 5630 രൂപയാണ്.

ആഗോള വിപണികളിലെ വിലവര്‍ധനയാണ് നിലവില്‍ പ്രാദേശിക വിപണികളില്‍ പ്രതിഫലിക്കുന്നത്. ആഗോള വിപണിയില്‍ സ്വര്‍ണം ഔണ്‍സിന് 4.38 ഡോളര്‍ വില കൂടി 2,426.83 ഡോളറിലാണ് വ്യാപാരം പുരോഗമിക്കുന്നത്. ഇന്നലെ സ്വര്‍ണവിലയില്‍ നേരിയ ഇടിവുണ്ടായിരുന്നു. മൂന്നു ദിവസം വിലമാറ്റമില്ലാതെ തുടര്‍ന്ന ശേഷം ഇന്നലെ പവന് 80 രൂപ കുറഞ്ഞിരുന്നു.

ഈ മാസം ഇതുവരെ സ്വര്‍ണം പവന് 1,280 രൂപ കൂടിയിട്ടുണ്ട്. 53,000 രൂപയില്‍ മാസം തുടങ്ങിയ സ്വര്‍ണമാണ് നിലവില്‍ 54,280ല്‍ എത്തി നില്‍ക്കുന്നത്.ഈ മാസത്തെ ഏറ്റവും താഴ്ന്ന സ്വര്‍ണ നിരക്ക് ജൂലൈ ഒന്നിന് രേഖപ്പെടുത്തിയ 53,000 രൂപയാണ്. ഇന്ന് 54,280 രൂപ രേഖപ്പെടുത്തിയതോടെ സ്വര്‍ണം മാസത്തെ ഏറ്റവും മികച്ച നിലവാരത്തിലെത്തി.

അതേസമയം വെള്ളിയുടെ വിലയില്‍ മാറ്റമില്ല. ഒരു ഗ്രാം സാധാരണ വെള്ളിയുടെ വില 99 രൂപയാണ്.

ഇന്ത്യക്കാർ കൊതിയോടെ കാത്തിരിക്കുന്ന ഓൺ​ലൈൻ ഷോപ്പിങ് ഉത്സവമായ ആമസോൺ ​പ്രൈം ഡേ ( Amazon Prime Day ) സെയിൽ അ‌രങ്ങേറാൻ ഇനി ദിവസങ്ങൾ മാത്രമാണ് ബാക്കിയുള്ളത്. ഈ ഓഫർ സെയിലിൽ സ്മാർട്ട്ഫോണുകൾക്കായി എന്തൊക്കെ ഡിസ്കൗണ്ടുകൾ ആണ് ആമസോൺ ഒരുക്കിയിട്ടുളളത് എന്ന് അ‌റിയാനുള്ള ആകാംക്ഷ ഏവരിലും സജീവമാണ്. ഈ ആകാംക്ഷകൾക്ക് കനം കൂട്ടിക്കൊണ്ട് ആമസോൺ ഇപ്പോൾ ചില ​പ്രൈം ഡേ സെയിൽ ഡിസ്കൗണ്ടുകൾ പ്രഖ്യാപിച്ചിട്ടുണ്ട്. ജൂ​ലൈ 20, 21 തിയതികളിൽ ആണ് ആമസോൺ ​പ്രൈം ഡേ സെയിൽ നിശ്ചയിച്ചിരിക്കുന്നത്.

​പ്രൈം ഡേ സെയിലിൽ പ്രീമിയം സ്മാർട്ട്ഫോണുകൾക്ക് ഉൾപ്പെടെ വൻ ഡിസ്കൗണ്ട് ലഭ്യമാണ് എന്ന് ആമസോൺ വാഗ്ദാനം ചെയ്യുന്നു. ഐഫോൺ 13, വൺപ്ലസ് നോർഡ് സിഇ 4, പോക്കോ എം6 തുടങ്ങി നിരവധി സ്മാർട്ട്ഫോണുകൾക്ക് ഈ ഓഫർ സെയിൽ സമയത്ത് ഡിസ്കൗണ്ട് ലഭിക്കും എന്ന് ഇപ്പോൾ ആമസോൺ സ്ഥിരീകരിച്ചിട്ടുണ്ട്.

ആമസോൺ പങ്കുവച്ചിരിക്കുന്ന പുതിയ ഡീറ്റെയിൽസ് പ്രകാരം, ​പ്രൈം ഡേ സെയിൽ സമയത്ത് ഐഫോൺ 13 മോഡൽ ബാങ്ക് ഡിസ്കൗണ്ട് ഉൾപ്പെടെ 47,999 രൂപയ്ക്ക് ലഭ്യമാകും. പ്രീമിയം സാംസങ് ഗാലക്‌സി സ്മാർട്ട്ഫോൺ ആയ എസ് 23 അൾട്ര കൂപ്പൺ ഡിസ്‌കൗണ്ടും ബാങ്ക് ഓഫറുകളും സഹിതം 74,999 രൂപ വിലയിൽ ലഭ്യമാകും.

അ‌തേപോലെ ഐക്യൂ നിയോ 9 പ്രോ മോഡൽ 29,999 രൂപയ്ക്കും വൺപ്ലസിന്റെ പ്രീമിയം സ്മാർട്ട്ഫോൺ ആയ വൺപ്ലസ് 12 5ജി 52,999 രൂപയ്ക്കും വിൽപ്പനയ്‌ക്കെത്തും. പ്രീമിയം സ്മാർട്ട്ഫോണുകൾക്ക് മാത്രമല്ല, മറ്റ് സെഗ്മെന്റുകളിലെ സ്മാർട്ട്ഫോണുകൾക്കും വമ്പൻ ഡിസ്കൗണ്ടുകൾ ഉറപ്പാണ് എന്ന് ആമസോൺ പറയുന്നു.

ഓഫറുകൾ സഹിതം 17,999 രൂപ പ്രാരംഭ വിലയിൽ മുതൽ വൺപ്ലസ് ​സ്മാർട്ട്ഫോണുകൾ ലഭ്യമാകുമെന്ന് ആമസോൺ പറയുന്നു. വൺപ്ലസ് 12 കഴിഞ്ഞാൽ ഏറ്റവും ശ്രദ്ധേയമായിട്ടുള്ള വൺപ്ലസ് 12R 5ജി ബാങ്ക് ഡിസ്കൗണ്ടും കൂപ്പൺ ഓഫറുകളും സഹിതം 40999 രൂപ ഡിസ്കൗണ്ട് വിലയിൽ ലഭ്യമാകും. കൂടാതെ 5000 രൂപയുടെ എക്സ്ചേഞ്ച് ഡിസ്കൗണ്ടും ലഭിക്കും.

പ്രൈം ഡേ സെയിലിൽ ഐക്യൂവിന്റെ 5ജി സ്മാർട്ട്ഫോണുകൾ 9999 രൂപ മുതൽ വിലയിൽ ലഭ്യമാകും എന്ന് ആമസോൺ ഉറപ്പുനൽകുന്നു. ഇത് ഏറ്റവും പുതിയതായി ഇന്ത്യയിൽ ലോഞ്ച് ചെയ്തിരിക്കുന്ന ഐക്യൂ Z9 ​ലൈറ്റ് 5ജി സ്മാർട്ട്ഫോൺ ആയിരിക്കും. മറ്റ് ജനപ്രിയ ഐക്യൂ സ്മാർട്ട്ഫോൺ മോഡലുകൾക്കും ഡിസ്കൗണ്ട് പ്രതീക്ഷിക്കാം.

താൽപര്യമുള്ള ഉപയോക്താക്കൾക്ക് സാംസങ് ഗാലക്സി സ്മാർട്ട്ഫോണുകളിൽ 8,000 രൂപ വരെ ഇൻസ്റ്റന്റ് ബാങ്ക് ഡിസ്കൗണ്ട് ലഭ്യമാകും. റെഡ്മി സ്മാർട്ട്ഫോണുകൾ ഡിസ്കൗണ്ടിന് ശേഷം 7699 രൂപ മുതൽ വിലയിൽ ലഭ്യമാകും. റെഡ്മിയുടെ 5ജി സ്മാർട്ട്ഫോൺ ആയ റെഡ്മി 12 5ജി കൂപ്പൺ ഡിസ്കൗണ്ട് സഹിതം 11499 രൂപ വിലയിൽ ലിസ്റ്റ് ചെയ്യും.

റിയൽമി സ്മാർട്ട്‌ഫോണുകൾ 7,499 രൂപ പ്രാരംഭ വിലയിൽ മുതൽ ​പ്രൈം ഡേ സെയിലിൽ ലഭ്യമാകും. കൂടാതെ, ഉപഭോക്താക്കൾക്ക് 1,000 രൂപ വരെ തൽക്ഷണ ബാങ്ക് കിഴിവും 4,000 രൂപ വരെ വിലയുള്ള കൂപ്പൺ ഓഫറുകളും ലഭിക്കും. റിയൽമി നാർസോ 70x സ്മാർട്ട്ഫോൺ 11,749 രൂപയ്ക്കും റിയൽമി നാർസോ 70 പ്രോ 15,249 രൂപ വിലയിലും ലഭ്യമാകും.

പോക്കോയുടെ സ്മാർട്ട്ഫോണുകൾ 6499 രൂപ മുതൽ വിലയിൽ ​പ്രൈം ഡേ സെയിലിന് ഉണ്ടാകും. പോക്കോ X6 5G ബാങ്ക് ഓഫർ ഉൾപ്പെടെ 17,999 രൂപയ്ക്ക് ലഭിക്കും. അ‌തേപോലെ പോക്കോ M6 5G ഒരു ബാങ്ക് ഡിസ്കൗണ്ടിന് ശേഷം 8,299 രൂപ വിലയിൽ ലഭിക്കും. അ‌തേപോലെ മോട്ടോ റേസർ 50 അൾട്രാ ഫ്ലിപ്പ് ഫോൺ 89,999 രൂപയ്ക്ക് വിൽപ്പനയ്‌ക്കെത്തും എന്നതും സ്ഥിരീകരിക്കപ്പെട്ടിട്ടുണ്ട്.

ഇന്ത്യയിൽ ഇപ്പോഴും മുകേഷ് അ‌ംബാനിയുടെ മകൻ ആനന്ദ് അംബാനിയും- രാധിക മെർച്ചന്റും തമ്മിലുള്ള വിവാഹത്തിന്റെ ചർച്ചകൾ കെട്ടടങ്ങിയിട്ടില്ല. മഴ പെയ്യുന്നത് നിന്നാലും മരം പെയ്യുന്നത് തുടരും എന്ന് പറയും പോലെ, വിവാഹം കഴിഞ്ഞിട്ടും വിവാഹ വാർത്തകൾ തുടരുന്നു. വിവാഹത്തിനെത്തിയ പ്രമുഖർ ആരൊക്കെ, ഭക്ഷണ വിഭവങ്ങൾ എന്തൊക്കെ, അ‌ംബാനി കുടുംബാംഗങ്ങൾ ധരിച്ച വസ്ത്രങ്ങൾ എന്തൊക്കെ, ആഭരണങ്ങൾ എന്തൊക്കെ, വാഹനങ്ങൾ ഏതൊക്കെ, കല്യാണം നടത്താൻ അ‌ംബാനിക്ക് എത്ര കോടി ചെലവായി… തുടങ്ങി എണ്ണമില്ലാത്ത വാർത്തകൾ വന്നുകൊണ്ടിരിക്കുന്നു. ഇനിയും ഏറെ വാർത്തകൾ വരാനുമിരിക്കുന്നു.

പറഞ്ഞുതീരാത്തത്ര വിവാഹ വിശേഷങ്ങൾ ഇനിയും പറയാനുണ്ടെന്നിരിക്കേ, അ‌ംബാനിക്കല്യാണവുമായി ബന്ധപ്പെടുത്തി ചിലർ വ്യാജ വാർത്തകളും പ്രചരിപ്പിക്കുന്നുണ്ട്. അ‌ംബാനിയുടെ വീട്ടിലെ കല്യാണം നിറഞ്ഞു നിൽക്കുന്നതിനിടയിൽ ഒരു വ്യാജ വാർത്ത ചുമ്മാ തട്ടിവിട്ടാൽ അ‌ത് ഏറ്റെടുക്കാനും ആളുണ്ടാകും എന്ന ചില വിരുതന്മാരുടെ കണക്കുകൂട്ടലിൽ നിന്നാകാം ജിയോയുമായി ബന്ധപ്പെട്ട് ഇപ്പോൾ ഒരു വ്യാജ വാർത്ത വാട്സ്ആപ്പ് വഴിയും മറ്റും പ്രചരിക്കുന്നുണ്ട്.

ആനന്ദ് അംബാനിയുടെ വിവാഹ ആഘോഷത്തിൻ്റെ ഭാഗമായി റിലയൻസ് ജിയോ തങ്ങളുടെ ഉപയോക്താക്കൾക്ക് 3 മാസത്തെ സൗജന്യ റീചാർജ് വാഗ്ദാനം ചെയ്യുന്നു എന്നതാണ് വാട്സ്ആപ്പ് വഴി പ്രചരിച്ചുകൊണ്ടിരിക്കുന്ന വ്യാജ വാർത്ത. മകന്റെ കല്യാണത്തിനായി കോടികൾ ചെലവഴിച്ച അ‌ംബാനി ഇതും ചെയ്തേക്കും എന്ന് കേൾക്കുന്ന ചിലരെങ്കിലും വിശ്വസിച്ചേക്കും. എന്നാൽ ഇത് തികച്ചും വ്യാജ വാർത്തയാണ്.

പ്രധാനമായും ഹിന്ദിയിലാണ് ഇത്തരം ഒരു സന്ദേശം പ്രചരിച്ചുകൊണ്ടിരിക്കുന്നത്. ഈ സൗജന്യ റീച്ചാർജ് ഓഫർ നേടുന്നതിനായി ഈ ലിങ്കിൽ ക്ലിക്ക് ചെയ്യൂ എന്ന സന്ദേശത്തോടൊപ്പം ഒരു വ്യാജ ലിങ്കും പ്രചരിക്കുന്നുണ്ട്. എന്നാൽ വിവാഹ ആഘോഷവുമായി ബന്ധപ്പെട്ട് ജിയോ സൗജന്യ ഡാറ്റ നൽകുന്നു എന്ന വാർത്ത തികച്ചും വ്യാജമാണ് എന്ന് ഇന്ത്യ ടുഡേ റിപ്പോർട്ട് ചെയ്തിരിക്കുന്നു.

ഇപ്പോൾ വാട്സ്ആപ്പ് വഴിയും മറ്റും പ്രചരിക്കുന്ന വ്യാജ സന്ദേശത്തിന്റെ മലയാളം ഇങ്ങനെയാണ്: “ജൂലൈ 12 ന് അനന്ത് അംബാനിയുടെ വിവാഹത്തോടനുബന്ധിച്ച്, മുകേഷ് അംബാനി ഇന്ത്യയിലെ എല്ലാവർക്കും 799 രൂപയുടെ 3 മാസത്തെ സൗജന്യ റീചാർജ് നൽകുന്നു. അതിനാൽ ഇപ്പോൾ താഴെയുള്ള നീല ലിങ്കിൽ ക്ലിക്ക് ചെയ്ത് നിങ്ങളുടെ നമ്പർ റീചാർജ് ചെയ്യുക.”

എന്നാൽ ഉപയോക്താക്കൾക്ക് സൗജന്യ റീച്ചാർജ് ഓഫർ നൽകിയിട്ടില്ലെന്നും അത്തരം സന്ദേശങ്ങൾ വിശ്വസിച്ചാൽ ചിലപ്പോൾ സാമ്പത്തിക നഷ്ടം ഉണ്ടായേക്കാമെന്നും ജിയോ മുന്നറിയിപ്പ് നൽകി. MyJio ആപ്പ് പോലുള്ള ഔദ്യോഗിക മാർഗങ്ങളിലൂടെയോ Google Pay പോലുള്ള വിശ്വസനീയമായ ഓൺലൈൻ പേയ്‌മെൻ്റ് ആപ്പുകൾ വഴിയോ മാത്രമേ റീച്ചാർജ് ചെയ്യാവൂ എന്നും ജിയോ തങ്ങളുടെ വരിക്കാരെ ഉപദേശിക്കുന്നു.

സമ്മാന പദ്ധതികളുടെ പേരിൽ വ്യാജ ലിങ്കുകൾ പ്രചരിപ്പിക്കുകയും പണം തട്ടുകയും ചെയ്യുന്നത് തട്ടിപ്പുകാരുടെ സ്ഥിരം രീതിയാണ്. ഇപ്പോൾ അ‌ംബാനിയുടെ മകന്റെ കല്യാണവും തട്ടിപ്പുകാർ അ‌വസരമായി കണ്ട് ഉപയോഗിക്കാൻ ശ്രമിക്കുകയായിരുന്നു. സൗജന്യ റീച്ചാർജിനായി നീല ലിങ്കിൽ ക്ലിക്ക് ചെയ്യുക എന്ന നിർദേശമാണ് ഈ തട്ടിപ്പിന്റെ ആണിക്കല്ല്. ഇത്തരം അ‌ജ്ഞാത ലിങ്കുകളിൽ ക്ലിക്ക് ചെയ്താൽ സുപ്രധാന വിവരങ്ങൾ പലതും നഷ്ടമായെന്നിരിക്കും.

ഇത്തരത്തിൽ വാഗ്ദാനങ്ങൾ അ‌ടങ്ങിയ മെസേജുകൾ കണ്ടാൽ അ‌ത് അ‌പ്പടി വിശ്വസിക്കാതെ, മെസേജിന്റെ ആധികാരികത ഉറപ്പാക്കാൻ ഔദ്യോഗിക ചാനലുകളിലൂടെയോ വെബ്‌സൈറ്റുകളിലൂടെയോ നൽകിയിട്ടുള്ള വിവരങ്ങൾ ക്രോസ്-ചെക്ക് ചെയ്യണം. കൂടാ​തെ സംശയാസ്പദമായ തട്ടിപ്പുകൾ റിപ്പോർട്ട് ചെയ്യുകയും വേണം. ഇതിലൂടെ മറ്റുള്ളവർ ഇത്തരം ലിങ്കുകളിൽ ക്ലിക്ക് ചെയ്ത് വഞ്ചിതരാകുന്നത് ഒഴിവാക്കാൻ സാധിക്കും.

എന്തിനും ഏതിനും വാട്സ്ആപ്പ് ഗ്രൂപ്പുകൾ ഉണ്ടാക്കുന്ന കാലമാണിത്. സ്മാർട്ട്ഫോൺ ഉപയോഗിക്കുന്നവരിൽ ബഹുഭൂരിപക്ഷവും വാട്സ്ആപ്പ് (WhatsApp) ഉപയോഗിക്കാറുണ്ട്. ഈ വാട്സ്ആപ്പ് ഉപയോക്താക്കളെല്ലാം ഏതെങ്കിലുമൊക്കെ വാട്സ്ആപ്പ് ഗ്രൂപ്പുകളിൽ അ‌ംഗവും ആയിരിക്കും. കാര്യങ്ങൾ പൊതുവായി ചർച്ച ചെയ്യാനും അ‌റിയാനും എപ്പോഴും എല്ലാവരുമായും കണക്ടായിരിക്കാനുമൊക്കെ വാട്സ്ആപ്പ് ഗ്രൂപ്പുകൾ ഏറെ സഹായിക്കും. എന്നാൽ നൂറ് നല്ല വാട്സ്ആപ്പ് ഗ്രൂപ്പുകൾ ഉണ്ട് എങ്കിൽ അ‌തിനെ വെല്ലുന്ന ആയിരക്കണക്കിന് വ്യാജ വാട്സ്ആപ്പ് ഗ്രൂപ്പുകളും സജീവമാണ്. ഒരു വാട്സ്ആപ്പ് ഗ്രൂപ്പുണ്ടാക്കാൻ ആർക്കും സാധിക്കും. അ‌തിൽ ​അ‌ംഗമാകണോ വേണ്ടയോ എന്ന് തീരുമാനിക്കും മുമ്പ് ചില കാര്യങ്ങൾ നിർബന്ധമായും അ‌റിഞ്ഞിരിക്കണം.

ഒരു വാട്സ്ആപ്പ് ഗ്രൂപ്പിൽ ആരെങ്കിലും നമ്മെ അ‌ംഗമാക്കിയാൽ അ‌ത് എന്ത് ഗ്രൂപ്പാണ്, ആരാണ് അ‌ത് ഉണ്ടാക്കിയത്, എന്തിന് വേണ്ടിയാണ് അ‌ത് ഉണ്ടാക്കിയത്, എപ്പോഴാണ് ആ ഗ്രൂപ്പ് ഉണ്ടാക്കപ്പെട്ടത് എന്നിങ്ങനെയുള്ള ചില കാര്യങ്ങൾ നാം അ‌റിഞ്ഞിരിക്കേണ്ടത് നമ്മുടെ സുരക്ഷയ്ക്ക് അ‌ത്യാവശ്യമാണ്. കാരണം വിവിധ ഓൺ​ലൈൻ തട്ടിപ്പുകാർ വാട്സ്ആപ്പിനെ തങ്ങളുടെ തട്ടിപ്പിനുള്ള പ്രധാന മാർഗമായി മാറ്റിയിരിക്കുന്നു.

വാട്സ്ആപ്പ് ഗ്രൂപ്പുകൾ വഴി നടക്കുന്ന തട്ടിപ്പുകളിൽ നിന്ന് ഉപയോക്താക്കളെ രക്ഷിക്കാനായി കഴിഞ്ഞ ആഴ്ച വാട്സ്ആപ്പ് ഒരു പുതിയ ഫീച്ചർ പുറത്തിറക്കുകയുണ്ടായി, കോൺടെക്സ്റ്റ് കാർഡ് ഫീച്ചർ (WhatsApp Context Card feature) എന്നാണ് ഈ ഫീച്ചറിന്റെ പേര്. ഒരാൾ ഏതെങ്കിലും ഒരു ഗ്രൂപ്പിൽ ചേരുന്നതിന് മുമ്പ് ആ ഗ്രൂപ്പിനെക്കുറിച്ച് അ‌യാൾക്ക് ആവശ്യമായ വിവരങ്ങൾ നൽകുക എന്നതാണ് ഈ ഫീച്ചർ ചെയ്യുന്നത്.

നമ്മുടെ കോൺടാക്ട് ലിസ്റ്റിൽ ഉള്ള ആരെങ്കിലും ആണോ ആ ഗ്രൂപ്പ് തുടങ്ങിയതെന്നും നമ്മളെ അ‌തിൽ ചേർത്തത് എന്നും അ‌റിയാൻ ഈ കാർഡ് സഹായിക്കും. ഈ കാർഡിൽ നിന്ന് ലഭിക്കുന്ന വിവരങ്ങൾ വിലയിരുത്തിയ ശേഷം, ആ ഗ്രൂപ്പിൽ ചേരണോ വേണ്ടയോ എന്ന് തീരുമാനിക്കാനുള്ള അ‌വസരം ഉപയോക്താവിന് ലഭിക്കുന്നു.

അ‌ടുത്തിടെയായി വാട്സ്ആപ്പിൽ ഗ്രൂപ്പുകൾ കേന്ദ്രീകരിച്ചുള്ള തട്ടിപ്പുകൾ വ്യാപകമായിട്ടുണ്ട്. പ്രധാനമായും സ്റ്റോക്ക് മാർക്കറ്റിന്റെയും മറ്റും പേരിലാണ് ഈ തട്ടിപ്പ് വാട്സ്ആപ്പ് ഗ്രൂപ്പുകൾ പ്രവർത്തിക്കുന്നത്. നിരവധി പേർ ഇപ്പോൾ സ്റ്റോക്ക് മാർക്കറ്റിൽ ഫണ്ട് ഇറക്കുന്നതിനെപ്പറ്റിയും ലാഭം ലഭിക്കുന്നതിനെപ്പറ്റിയുമൊക്കെ അ‌റിയാൻ ആഗ്രഹിക്കുന്നു. ഈ ആഗ്രഹമാണ് തട്ടിപ്പുകാർ ചൂഷണം ചെയ്യുന്നത്.

സ്റ്റോക്ക് മാർക്കറ്റിൽ ലാഭം നേടാനുള്ള ടിപ്സുകൾ പറഞ്ഞു നൽകുന്ന ഇടം എന്ന നിലയ്ക്ക് ചില വാട്സ്ആപ്പ് ഗ്രൂപ്പുകൾ തട്ടിപ്പുകാർ തുടങ്ങുന്നു. സ്റ്റോക്ക് മാർക്കറ്റ് തൽപരരായ ആളുകൾ ഈ ടിപ്സുകളിൽ ആകൃഷ്ടരായി ഇത്തരം ഗ്രൂപ്പുകളിലേക്ക് ചെന്ന് എത്തുന്നു. തുടക്കത്തിൽ ഗ്രൂപ്പം അ‌ംഗങ്ങളെ വിശ്വസിപ്പിക്കും വിധത്തിലുള്ള കാര്യങ്ങളായിരിക്കും ഈ ഗ്രൂപ്പുകളിൽ പോസ്റ്റ് ചെയ്യപ്പെടുക.

ഇങ്ങനെ ആളുകളുടെ വിശ്വാസം നേടിയെടുത്ത ശേഷം തട്ടിപ്പുകാർ ഒരു പ്രത്യേക “ഷെയർ ട്രേഡിംഗ് അക്കൗണ്ടും” സോഫ്‌റ്റ്‌വെയറും അ‌ംഗങ്ങളെ പരിചയപ്പെടുത്തും. ഫലങ്ങളിൽ കൃത്രിമം കാണിക്കുക, തങ്ങളുടെ നിക്ഷേപം ഗണ്യമായ വരുമാനം ഉണ്ടാക്കുന്നുവെന്ന് ആളുകളെ വിശ്വസിക്കാൻ പ്രേരിപ്പിക്കുന്ന വിധത്തിൽ വ്യാജ ലാഭം പ്രദർശിപ്പിക്കുക തുടങ്ങിയവ സാധ്യമായ രീതിയിലാണ് ഈ സോഫ്‌റ്റ്‌വെയർ ഉണ്ടാക്കപ്പെടുക.

തങ്ങളുടെ നിക്ഷേപ പദ്ധതിയുടെ ഭാഗമായാൽ വളരെയധികം ലാഭം നേടാൻ കഴിയുമെന്ന് ഇത്തരം മാർഗങ്ങളിലൂടെ ഈ തട്ടിപ്പുകാർ ആളുകളെ വിശ്വസിക്കുന്നു. ഇങ്ങനെ വിശ്വസിക്കുന്ന ആളുകളോട് പിന്നീട് ഇവർ നിക്ഷേപത്തിനായി തുക ​കൈമാറാൻ ആവശ്യപ്പെടുന്നു. തുടർന്ന് പണവുമായി സ്ഥലം വിടുന്നു. ഇത്തരത്തിലുള്ള തട്ടിപ്പുകൾ നടക്കുന്ന വാട്സ്ആപ്പ് ഗ്രൂപ്പുകൾ വർധിച്ചുവരുന്നുണ്ട്.

സ്റ്റോക്ക് മാർക്കറ്റുമായി ബന്ധപ്പെട്ട് മാത്രമല്ല, പാർട്ട്​ടൈം ജോലി പോലെ മറ്റ് വിവിധ ആവശ്യങ്ങളുടെ പേരിലും വ്യാജ വാട്സ്ആപ്പ് ഗ്രൂപ്പുകൾ പ്രവർത്തിക്കുന്നുണ്ട്. ഇത്തരം തട്ടിപ്പുകളിൽ ചെന്ന് ചാടാതിരിക്കാൻ ഒരു ഗ്രൂപ്പിൽ ചേരും മുമ്പ് ആ ഗ്രൂപ്പിനെ കുറിച്ചുള്ള പ്രധാന വിവരങ്ങൾ എല്ലാം അ‌റിയാൻ വാട്സ്ആപ്പ് പുതിയതായി അ‌വതരിപ്പിച്ച കോൺടെക്സ്റ്റ് കാർഡ് ഫീച്ചർ ഉപയോക്താക്കളെ സഹായിക്കും.

ഒരു ഗ്രൂപ്പിൽ അ‌ംഗമാക്കപ്പെടുകയോ അ‌ംഗമാകാൻ ക്ഷണം ലഭിക്കുകയോ ചെയ്താൽ അ‌തിൽ ചേര​ണോ വേണ്ടയോ എന്ന് തീരുമാനമെടുക്കാൻ കോൺടെക്സ്റ്റ് കാർഡ് ഫീച്ചർ വാട്സ്ആപ്പ് ഉപയോക്താക്കൾക്ക് സഹായകമാണ്. ഈ പുതിയ ഫീച്ചർ ഇതിനകം ആൻഡ്രോയിഡ്, ഐഒഎസ് ഉപയോക്താക്കൾക്കായി ലഭ്യമാക്കി തുടങ്ങിയിട്ടുണ്ട്. വരും ദിവസങ്ങളിൽ ഈ ഫീച്ചർ കൂടുതൽ പേരിലേക്ക് എത്തും.

കുറഞ്ഞ വിലയിൽ ​നല്ലൊരു 5ജി സ്മാർട്ട്ഫോൺ വാങ്ങാൻ ഇനി ഡിസ്കൗണ്ടുകളും ഓഫർ സെയിലുകളും ബാങ്ക് കാർഡുകളും അ‌ന്വേഷിച്ച് നടക്കേണ്ട. ബജറ്റ് വിലയിൽ ആർക്കും ഈസിയായി വാങ്ങാനാകും വിധത്തിൽ പുതിയ ഐക്യൂ Z9 ​ലൈറ്റ് 5ജി (iQOO Z9 Lite 5G ) സ്മാർട്ട്ഫോൺ ഇന്ത്യയിൽ ലോഞ്ച് ചെയ്തു. 4ജി ഫോൺ ഉപയോഗിക്കുന്നവർക്കും ഫീച്ചർ ഫോണുകളിൽ നിന്ന് 5ജി സ്മാർട്ട്ഫോണുകളിലേക്ക് മാറാൻ ആഗ്രഹിക്കുന്നവർക്കും ഇനി ഏറ്റവും മികച്ച ഓപ്ഷനുകളിലൊന്നായി ഐക്യൂ Z9 ​ലൈറ്റ് 5ജി ഇന്ത്യൻ സ്മാർട്ട്ഫോൺ വിപണിയിൽ ഉണ്ടാകും.

ഇന്ത്യയിലെ സ്മാർട്ട്ഫോൺ പ്രേമികളുടെ, പ്രത്യേകിച്ച് യുവ തലമുറയിലെ സ്മാർട്ട്ഫോൺ ഉപയോക്താക്കളുടെ ഇഷ്ട സ്മാർട്ട്ഫോൺ ബ്രാൻഡാണ് ഐക്യൂ (IQOO). എല്ലാ സെ​ഗ്മെന്റുകളിലും സ്മാർട്ട്ഫോണുകൾ ഇറക്കുകയും അ‌വ ആ വിലയിൽ ലഭ്യമാകുന്ന ഏറ്റവും മികച്ച സ്മാർട്ട്ഫോൺ ആണ് എന്ന് ഉറപ്പാക്കുകയും ചെയ്യുന്നതിൽ ഐക്യൂ എപ്പോഴും ശ്രദ്ധിക്കാറുണ്ട്. പുതിയ ഐക്യൂ Z9 ​ലൈറ്റ് 5ജി സാധാരണക്കാർക്കുള്ള ഐക്യുവിന്റെ സമ്മാനമാണ്.

10000 രൂപയിൽ താഴെ വില നൽകിക്കൊണ്ട് മികച്ച ഫീച്ചറുകളുള്ള ഒരു സ്മാർട്ട്ഫോണിലൂടെ 5ജിയുടെ ലോകത്തേക്ക് നടന്നുകയറാൻ പുതിയ ഐക്യൂ Z9 ​ലൈറ്റ് 5ജി സാധാരണക്കാർക്ക് തുണയാകും. ഇതിനകം വിവിധ സെഗ്മെന്റുകളിലായി ഐക്യൂ Z9 സീരീസ് ഫോണുകൾ ഇന്ത്യയിൽ ലഭ്യമാണ്. Z9 സീരീസിലെ ഏറ്റവും നിരക്ക് കുറഞ്ഞ സ്മാർട്ട്ഫോൺ എന്ന നിലയിലാണ് Z9 ​ലൈറ്റ് 5ജി അ‌വതരിപ്പിക്കപ്പെട്ടിരിക്കുന്നത്.
ഐക്യുവിന്റെ ഇന്ത്യയിലെ ആദ്യത്തെ എൻട്രി ലെവൽ സ്‌മാർട്ട്‌ഫോൺ എന്ന പ്രത്യേകതയും ഐക്യൂ Z9 ​ലൈറ്റ് 5ജിക്ക് ഉണ്ട്. മീഡിയടെക് ഡിമെൻസിറ്റി 6300 ചിപ്സെറ്റ് കരുത്താക്കിയാണ് ഈ ബജറ്റ് 5ജി ഫോൺ എത്തിയിരിക്കുന്നത്. 6ജിബി റാമിനൊപ്പം 6ജിബി വെർച്വൽ റാമും ഈ ഫോണിലുണ്ട്. അ‌തിനാൽ തന്നെ പെർഫോമൻസ് ഒട്ടും മോശമാകില്ല എന്ന് ഉറപ്പിക്കാനാകും.

ഐക്യൂ Z9 ​ലൈറ്റ് 5ജിയുടെ പ്രധാന ഫീച്ചറുകൾ: 6.56 ഇഞ്ച് (1612 × 720 പിക്സലുകൾ) HD+ 20:9 LCD സ്ക്രീൻ, 90Hz റിഫ്രഷ് റേറ്റ്, 840 nits വരെ പീക്ക് ​ബ്രൈറ്റ്നസ് എന്നിവ ഇതിലുണ്ട്. ഒക്ട കോർ മീഡിയടെക് ഡൈമെൻസിറ്റി 6300 6nm പ്രൊസസർ ആണ് ഈ സ്മാർട്ട്ഫോണിന്റെ കരുത്ത്

Arm മാലി-G57 MC2 ജിപിയുവും 4GB/ 6GB LPDDR4x റാം, 128GB eMMC 5.1 സ്റ്റോറേജ്, മൈക്രോ എസ്ഡി ഉപയോഗിച്ച് 1TB വരെ സ്റ്റോറേജ് വർധിപ്പിക്കാനുള്ള ഓപ്ഷൻ എന്നിവയും Z9 ​ലൈറ്റ് 5ജി വാഗ്ദാനം ചെയ്യുന്നു. ആൻഡ്രോയിഡ് 14 അ‌ടിസ്ഥാനമാക്കിയുള്ള ഫൺടച്ച്ഒഎസ് 14ലാണ് പ്രവർത്തനം. 2 വർഷത്തെ ആൻഡ്രോയിഡ് അപ്‌ഡേറ്റുകളും 3 വർഷത്തെ സുരക്ഷാ അപ്‌ഡേറ്റുകളും ലഭിക്കും.

ഡ്യുവൽ റിയർ ക്യാമറ സജ്ജീകരണമാണ് ഈ ബജറ്റ് 5ജി ഫോണിൽ ഐക്യൂ നൽകിയിരിക്കുന്നത്. എഫ്/1.8 അപ്പേർച്ചർ, സോണി സെൻസർ എന്നിവയുള്ള 50എംപി മെയിൻ ക്യാമറ, എഫ്/2.4 അപ്പേർച്ചറുള്ള 2എംപി ഡെപ്ത് സെൻസർ എന്നിവ ഇതിൽ അ‌ടങ്ങുന്നു. ഒപ്പം എൽഇഡി ഫ്ലാഷും ഉണ്ട്. ഫ്രണ്ടിൽ f/2.0 അപ്പേർച്ചർ ഉള്ള 8MP ക്യാമറയും നൽകിയിട്ടുണ്ട്.

സൈഡ് മൗണ്ട് ഫിംഗർപ്രിൻ്റ് സെൻസർ, 3.5 എംഎം ഓഡിയോ ജാക്ക്, IP64 റേറ്റിങ്, ഹൈബ്രിഡ് ഡ്യുവൽ സിം (നാനോ + നാനോ / മൈക്രോ എസ്ഡി), 5G (n1/n3/n5/n8/n28B/n40/n77/n78 ബാൻഡുകൾ), ഡ്യുവൽ 4G VoLTE, Wi-Fi 802.11 ac (2.4GHz + 5GHz), ബ്ലൂടൂത്ത് 5.4, GPS, യുഎസ്ബി ​​ടൈപ്പ്-സി എന്നിവയും ഇതിലുണ്ട്.

15W ഫാസ്റ്റ് ചാർജിംഗുള്ള 5000mAh ബാറ്ററിയാണ് ഇതിലുള്ളത്. അക്വാ ഫ്ലോ, മോച്ച ബ്രൗൺ നിറങ്ങളിൽ ഈ സ്മാർട്ട്ഫോൺ എത്തുന്നു. ഐക്യൂ Z9 ​ലൈറ്റ് 5ജിയുടെ 4GB + 128GB മോഡലിന് 10,499 രൂപയും 6GB + 128GB മോഡലിന് 11,499 രൂപയും ആണ് വില.

2024 ജൂലൈ 20 മുതൽ ആമസോൺ വഴിയും ഐക്യൂ ഇന്ത്യ ഇ-സ്റ്റോർ വഴിയും ഐക്യൂ Z9 ​ലൈറ്റ് 5ജി സ്മാർട്ട്ഫോൺ ലഭ്യമാകും. വിൽപ്പന ആരംഭിക്കുന്നതിനോട് അ‌നുബന്ധിച്ച് ആകർഷകമായ ലോഞ്ച് ഓഫറുകളും ലഭ്യമാക്കിയിട്ടുണ്ട്. ബജറ്റ് വിലയാണ് എന്നതിന് പുറമേ ഡിസ്കൗണ്ടും ലഭ്യമാകുന്നു എന്നത് ഈ ഫോൺ വാങ്ങാനുള്ള താൽപര്യം വർധിപ്പിക്കുന്നു.

ICICI/ HDFC ബാങ്ക് ഡെബിറ്റ് കാർഡ്, ക്രെഡിറ്റ് കാർഡ് എന്നിവ ഉപയോഗിച്ച് പർച്ചേസ് ചെയ്യുമ്പോൾ 500 രൂപ ഇൻസ്റ്റന്റ് ഡിസ്കൗണ്ട് ലഭിക്കും. അ‌തിനാൽ അ‌ടിസ്ഥാന മോഡൽ 9999 രൂപയ്ക്ക് സ്വന്തമാക്കാനാകും. ഇതോടൊപ്പം

549 രൂപ വിലയുള്ള വിവോ കളർ ഇയർഫോണുകൾ വെറും 399 രൂപയ്ക്ക് സ്വന്തമാക്കാനുള്ള അ‌വസരവുമുണ്ട്. ജൂലൈ 31 വരെയാണ് ഈ ഓഫറുകൾ ലഭ്യമാകുക.

രാജ്യത്തെ എംഎസ്എംഇകളുടെ ഡിജിറ്റല്‍ മുന്നേറ്റത്തെ കൂടുതല്‍ ശക്തിപ്പെടുത്താനായി മുന്‍നിര ടെലികോം സേവനദാതാവായ വിയുടെ സംരംഭകത്വ വിഭാഗമായ വി ബിസിനസ് മുന്‍നിര ഡിജിറ്റല്‍ സേവന ദാതാവായ പേയുവുമായി സഹകരിക്കും. ചെറുകിട, ഇടത്തരം, സൂക്ഷ്മ സംരംഭങ്ങള്‍ക്ക് ഡിജിറ്റല്‍ പെയ്‌മെന്റ് സൗകര്യങ്ങള്‍ ഏര്‍പ്പെടുത്താനായണ് ഈ സഹകരണം.

പണമടക്കല്‍, ഇപ്പോള്‍ വാങ്ങി പിന്നീടു പണം നല്‍കുന്ന സൗകര്യങ്ങള്‍, വാട്ട്‌സാപ്പുമായുള്ള തടസമില്ലാത്ത സംയോജനം തുടങ്ങിയ നിരവധി സൗകര്യങ്ങള്‍ ലഭിക്കും. എംഎസ്എംഇ വിഭാഗങ്ങള്‍ക്കായുള്ള റെഡിഫോര്‍നെക്സ്റ്റ് പദ്ധതിയുടെ ഭാഗമായി നിരവധി സൗകര്യങ്ങളാണ് വി ബിസിനസ് ലഭ്യമാക്കുന്നത്. പ്രതിവര്‍ഷം 65,280 രൂപ മൂല്യമുള്ള നേട്ടങ്ങള്‍ ലഭ്യമാക്കുന്ന ബിസിനസ് പ്ലസ് പ്ലാന്‍ വെറും 349 രൂപയ്ക്ക് വി ലഭ്യമാക്കിയിട്ടുമുണ്ട്.

ചെറുകിട, ഇടത്തരം സംരംഭങ്ങളെ ഡിജിറ്റലായി ശാക്തീകരിക്കുന്നതിലുളള തങ്ങളുടെ പ്രതിബദ്ധതയാണ് പേയുവുമായുള്ള തങ്ങളുടെ സഹകരണം വ്യക്തമാക്കുന്നതെന്ന് വോഡഫോണ്‍ ഇന്ത്യ ചീഫ് എന്റര്‍പ്രൈസ് ബിസിനസ് ഓഫിസര്‍ അരവിന്ദ് നേവാറ്റിയ പറഞ്ഞു. ബിസിനസ്, ഡിജിറ്റല്‍ ഫിനാന്‍സ് സംബന്ധിച്ച നിരവധി സേവനങ്ങളാണ് ഈ സഹകരണത്തിലൂടെ ലഭ്യമാക്കുന്നതെന്ന് പേയു ചീഫ് എക്‌സിക്യൂട്ടീവ് ഓഫീസര്‍ അനിര്‍ബന്‍ മുഖര്‍ജി പറഞ്ഞു.

തിരുവനന്തപുരം: പ്ലോട്ടിന്‍റെ 75 ശതമാനവും ഓപ്പണ്‍ സ്‌പേസായിവിട്ട് ഓക്‌സിജന്‍ പാര്‍ക്ക്, മിയാവാകി വനം തുടങ്ങിയ ലീഫ്‌ സ്റ്റൈല്‍ സംവിധാനങ്ങളോടെ നിര്‍മിക്കുന്ന സംസ്ഥാനത്തെ ആദ്യ പാര്‍പ്പിട പദ്ധതിയായ അസറ്റ് ദി ലീഫിന് തിരുവനന്തപുരം കാര്യവട്ടത്ത് മുത്തൂറ്റ് ഗ്രൂപ്പ് ചെയര്‍മാന്‍ ജോര്‍ജ് ജേക്കബ് മുത്തൂറ്റ്, അസറ്റ് ഹോംസ് മാനെജിങ് ഡയറക്ടര്‍ വി. സുനില്‍ കുമാര്‍, കോര്‍പ്പറേഷന്‍ കൗണ്‍സിലര്‍ എം. ബിനു, ലൂര്‍ദ് മാതാ ചര്‍ച്ച് വികാരി ഫാ. ജെറാര്‍ഡ് ദാസന്‍ എന്നിവര്‍ ചേര്‍ന്ന് തറക്കല്ലിട്ടു.

2, 3 ബെഡ്‌റൂം ലക്ഷ്വറി അപ്പാര്‍ട്ട്‌മെന്‍റ് പദ്ധതിയായ അസറ്റ് ദി ലീഫില്‍ അപ്പാര്‍ട്ട്‌മെന്‍റുകള്‍ ബുക്കു ചെയ്യുന്നവരെല്ലാം പ്ലോട്ടില്‍ ഒരു മരം വീതം നട്ടുകൊണ്ടായിരിക്കും ബുക്കിങ് പൂര്‍ത്തിയാക്കുകയെന്ന് അസറ്റ് ഹോംസ് മാനെജിങ് ഡയറക്റ്റര്‍ സുനില്‍ കുമാര്‍ പറഞ്ഞു. ഇവയുടെ പരിപാലനം അസറ്റ് ഹോംസ് ഏറ്റെടുക്കും.

ചട്ടങ്ങള്‍ പാലിച്ചുള്ള ഗ്രീന്‍ സര്‍ട്ടിഫിക്കേഷനുപരി എല്ലാ അർഥത്തിലും പ്രകൃതിയുമായി ഇണങ്ങിയുള്ള ജീവിതരീതിയാണ് അസറ്റ് ദി ലീഫില്‍ വിഭാവനം ചെയ്യുന്നതെന്നും സുനില്‍ കുമാര്‍ പറഞ്ഞു. സംസ്ഥാനത്തെ ആദ്യ ഓക്‌സിജന്‍ പാര്‍ക്കിനു പുറമെ മിയാവാകി വനം, ആംഫി തീയറ്റര്‍, ഓപ്പണ്‍ ജിം എന്നിവയും അസറ്റ് ദി ലീഫിന്‍റെ ഭാഗമാകും.

വൈദ്യുതി ഉപയോഗം പരമാവധി കുറയ്ക്കുന്ന വിധത്തിലാണ് പദ്ധതിയുടെ രൂപകല്‍പ്പന. ചൂട് പരമാവധി കുറവു മാത്രം ആഗിരണം ചെയ്യുന്ന പോറോതെര്‍മ് ബ്രിക്കുകളാണ് നിര്‍മാണത്തിൽ ഉപയോഗിക്കുക. സൂര്യപ്രകാശം കടത്തിവിടുന്ന രൂപകല്‍പ്പനയിലൂടെയും ഇന്ധനം ലാഭിക്കും. റെയിൻ വാട്ടര്‍ ഹാര്‍വെസ്റ്റിങ്ങിനു പുറമെ ഉപയോഗിക്കുന്ന വെള്ളത്തിന്‍റെ 35% എങ്കിലും റീസൈക്കിൾ ചെയ്യുന്ന സംവിധാനവുമുണ്ടാകും

ഗോദ്‌റെജ് കണ്‍സ്യൂമര്‍ പ്രൊഡക്ട്‌സിലെ ശാസ്ത്രജ്ഞര്‍ അവരുടെ പങ്കാളികളുമായി ചേര്‍ന്ന് ഇന്ത്യയില്‍ തദ്ദേശീയമായി വികസിപ്പിച്ചതും പേറ്റന്റ് ഉള്ളതുമായ ആദ്യത്തെ മോളിക്യൂള്‍ ആയ റെനോഫ്‌ളൂത്രിന്‍ വികസിപ്പിച്ചു. കൊതുകു നിയന്ത്രണത്തിനായുള്ള ഏറ്റവും ഫലപ്രദമായ ലിക്വിഡ് വേപറൈസര്‍ ഫോര്‍മുലേഷനാണ് ഇതുണ്ടാക്കുന്നത്.

നിലവില്‍ ഇന്ത്യയില്‍ ലഭ്യമായ ഏതു രജിസ്‌ട്രേഡ് ലിക്വിഡ് വേപറൈസര്‍ ഫോര്‍മാറ്റുകളേക്കാളും കൊതുകുകള്‍ക്കെതിരെ രണ്ടു മടങ്ങു കൂടുതല്‍ ഫലപ്രദമാണ് റെനോഫ്‌ളൂത്രിനിലൂടെ നിര്‍മിക്കുന്ന ഈ ഫോര്‍മുലേഷന്‍. കഠിനമായ പരിശോധനകളും സെന്‍ട്രല്‍ ഇന്‍സെക്ടിസൈഡ് ബോര്‍ഡ് ആന്റ് രജിസ്‌ട്രേഷന്‍ കമ്മിറ്റിയുടെ അംഗീകാരവും ഇതിന്റെ സുരക്ഷ ഉറപ്പാക്കുന്നു.

പുതുമകള്‍ അവതരിപ്പിക്കന്നതില്‍ 127 വര്‍ഷത്തെ പാരമ്പര്യമുള്ള ഗോദ്‌റെജ് ഇന്ത്യയില്‍ തദ്ദേശീയമായ പല പുതുമകളും അവതരിപ്പിച്ചിട്ടുണ്ടെന്ന് ഗോദ്‌റെജ് കണ്‍സ്യൂമര്‍ പ്രൊഡക്ട്‌സ് ലിമിറ്റഡ് മാനേജിങ് ഡയറക്ടറും സിഇഒയുമായ സുധീര്‍ സിതാപതി ചൂണ്ടിക്കാട്ടി.

രജിസ്‌ട്രേഷന്‍ ഇല്ലാത്തതും നിയമവിരുദ്ധമായ ചൈനീസ് മോളിക്യൂളുകളും ഇന്ത്യയിലേക്കു വിവിധ രീതികളിലൂടെ എത്തുന്നുണ്ട്. റെനോഫ്‌ളുത്രിന്‍ ഇന്ത്യയുടെ തദ്ദേശീയമായി വികസിപ്പിച്ച ആദ്യത്തെ മൊസ്‌കിറ്റോ റിപെല്ലന്റ് മോളിക്യൂളാണ്. നിയമവിരുദ്ധ മോളിക്യൂളുകള്‍ ഉള്ള ഉല്‍പന്നങ്ങള്‍ ഉപയോഗിക്കുന്നതില്‍ നിന്ന് ഇതു ജനങ്ങളെ അകറ്റി നിര്‍ത്തുമെന്നും അദ്ദേഹം പറഞ്ഞു.

കുടുംബത്തെ കൊതുകുകളില്‍ നിന്നു സംരക്ഷിക്കാനായി ലിക്വിഡ് വേപറൈസറുകള്‍ ഉപയോഗിക്കുന്നതിനാണ് 63 ശതമാനം ഇന്ത്യക്കാരും മുന്‍ഗണന നല്‍കുന്നതെന്ന് ഗുഡ്‌നൈറ്റ് നടത്തിയ ഗവേഷണം വെളിപ്പെടുത്തിയിരുന്നു.പുതിയ ലിക്വിഡ് വേപറൈസര്‍ കൊതുകകളെ രണ്ടിരട്ടി വേഗത്തില്‍ പായിക്കുകയും സ്വിച്ച് ഓഫ് ചെയ്തു കഴിഞ്ഞും രണ്ടു മണിക്കൂര്‍ പ്രവര്‍ത്തിക്കകുയും ചെയ്യും.

മലേറിയ, ഡെങ്കിപ്പനി തുടങ്ങിയ കൊതുകുകള്‍ പരത്തുന്ന രോഗങ്ങള്‍ ഗുരുതരമായ ആരോഗ്യപ്രശ്‌നങ്ങള്‍ ഉണ്ടാക്കുകന്നതോടൊപ്പം കാര്യമായ സാമ്പത്തിക ബാധ്യതകള്‍ ഉണ്ടാക്കുകയും ചെയ്യുന്നു. അതുകൊണ്ട് കൊതുകിനെതിരെ ഫലപ്രദമായ സംരക്ഷണം ഉണ്ടായിരിക്കേണ്ടതാണ്. മലേറിയയ്ക്കും ഡെങ്കിപ്പനിക്കും കാരണമാകുന്ന സാധാരണ കൊതുകുകള്‍ക്കെതിരെ റെനോഫ്‌ളുത്രിന് വളരെ ഫലപ്രതമാണ്.

അതിന്റെ തല്‍ക്ഷണ നൊക്ക്-ഡൗണ്‍ ഇഫക്റ്റും നീണ്ടുനില്‍ക്കുന്ന സംരക്ഷണവും കൊതുകുകളുടെ എണ്ണം കുറയ്ക്കുന്നതിലും അതിലൂടെ രോഗങ്ങള്‍ പകരുന്നത് ശക്തമായി തടയുമെന്നും പ്രമുഖ ഡെവലപ്‌മെന്റ് പീഡിയാട്രീഷ്യനും ഇന്ത്യന്‍ അക്കാദമി ഓഫ് പീഡിയാട്രിക്‌സിലെ (ഐഎപി) സീനിയര്‍ അംഗവുമായ ഡോ സമീര്‍ ദല്‍വായി പറഞ്ഞു.

യാത്രക്കാരുടെ എണ്ണത്തില്‍ വര്‍ദ്ധനയുണ്ടായതോടെ അധിക ട്രിപ്പുമായി കൊച്ചി മെട്രോ. ജൂലൈ 15 മുതല്‍ അധിക ട്രെയിനുകള്‍ ഏര്‍പ്പെടുത്തിയതായി കൊച്ചി മെട്രോ അറിയിച്ചു. ഒരു ദിവസം 12 ട്രിപ്പുകള്‍ കൂടുതലായി ഉണ്ടാവും. കഴിഞ്ഞ പത്ത് ദിവസമായി കൊച്ചി മെട്രോയ്ക്ക് പ്രതിദിനം ഒരുലക്ഷത്തിലധികം യാത്രക്കാരെ ലഭിച്ചതിനാലാണ് കെഎംആര്‍എല്‍ സര്‍വീസുകള്‍ കൂട്ടാനുള്ള തീരുമാനത്തിലെത്തിയത്.

തിരക്കുള്ള സമയങ്ങളില്‍ യാത്രക്കാരുടെ തിരക്കും ട്രെയിനുകള്‍ക്കിടയിലുള്ള കാത്തിരിപ്പ് സമയവും കുറയ്ക്കുകയാണ് ലക്ഷ്യം. രാവിലെ 8 മുതല്‍ 10 വരെയും വൈകുന്നേരം 4 മുതല്‍ 7 വരെയുമുള്ള തിരക്കേറിയ സമയങ്ങളിലാണ് പുതിയ ഷെഡ്യൂള്‍ വരുന്നത്. ഈ സമയങ്ങളില്‍ ഏഴ് മിനിട്ട് ഇടവേളകളില്‍ ട്രെയിനുകള്‍ സര്‍വ്വീസ് നടത്തും.

ഈ വര്‍ഷം കൊച്ചി മെട്രോയില്‍ ഇതുവരെ 1,64,27,568 യാത്രക്കാര്‍ യാത്ര ചെയ്തുകഴിഞ്ഞു. 2024 ജനുവരി ഒന്നുമുതല്‍ ജൂണ്‍ 30 വരെ 1,64,27,568 യാത്രക്കാര്‍ കൊച്ചി മെട്രോയില്‍ സഞ്ചരിച്ചു. 2024 ജൂലൈ ഒന്നുമുതല്‍ ജൂലൈ 11 വരെ 11,99,354 യാത്രക്കാരാണ് കൊച്ചി മെട്രോയില്‍ സഞ്ചരിച്ചത്.

എച്ച്ഡിഎഫ്സി ബാങ്ക് മാര്‍ജിനല്‍ കോസ്റ്റ് ഓഫ് ഫണ്ട് അധിഷ്ഠിത വായ്പാ നിരക്കുകള്‍ (എംസിഎല്‍ആര്‍) ഉയര്‍ത്തി. ബാങ്ക് ചില നിശ്ചിത കാലയളവുകളിലെ വായ്പാ നിരക്കുകള്‍ 10 ബേസിസ് പോയിന്റുകള്‍ (ബിപിഎസ്) വരെയാണ് വര്‍ധിപ്പിച്ചിരിക്കുന്നത്. ഇതോടെ എച്ച്ഡിഎഫ്സി ബാങ്ക് എംസിഎല്‍ആര്‍ പലിശ നിരക്ക് ഇപ്പോള്‍ 9.05%നും 9.40%നും ഇടയിലായി.

ബാങ്ക് വായ്പാ നിരക്കുകള്‍ ഒരു മാസത്തേക്ക് 9%ല്‍ നിന്ന് 9.10% ആയി വര്‍ധിപ്പിച്ചു. മൂന്ന് മാസത്തെ കാലായളവിലേക്ക് ബാങ്ക് 9.15%ല്‍ നിന്ന് 9.20% ആയി വര്‍ധിച്ചു. ആറ് മാസത്തെ എംസിഎല്‍ആര്‍ 9.30 ശതമാനത്തില്‍ നിന്ന് 9.35 ശതമാനമായി ഉയര്‍ത്തി. നിരവധി ഉപഭോക്തൃ വായ്പകളുമായി ബന്ധിപ്പിച്ചിട്ടുള്ള ഒരു വര്‍ഷത്തെ എംസിഎല്‍ആര്‍ 9.30 ശതമാനത്തില്‍ നിന്ന് 9.40 ശതമാനമായി ഉയര്‍ന്നു.

രണ്ട് വര്‍ഷത്തെയും മൂന്ന് വര്‍ഷത്തെയും എംസിഎല്‍ആര്‍ പരിഷ്‌ക്കരണത്തിന് ശേഷം 9.40 ശതമാനമായി ഉയര്‍ത്തി. നിരക്കുകള്‍ 2024 ജൂലൈ 8 മുതല്‍ പ്രാബല്യത്തില്‍ വരും. ഫണ്ട് അധിഷ്ഠിത വായ്പാ നിരക്കിന്റെ മാര്‍ജിനല്‍ കോസ്റ്റ് എന്നത് ഒരു പ്രത്യേക ലോണിന് ഒരു ധനകാര്യ സ്ഥാപനം ഈടാക്കേണ്ട ഏറ്റവും കുറഞ്ഞ പലിശ നിരക്കാണ്.